SRHకు పెద్ద మైనస్ అదే..

ఆ ప్లేయర్లను ఎందుకు వదులుకున్నారు.. మాజీ ప్లేయర్ సూటి ప్రశ్న?

జై భీమ్ టీవీ - క్రీడలు / : అబుదాబి వేదికగా జరిగిన ఐపీఎల్ 2026 మినీ వేలంలో సన్‌రైజర్స్ హైదరాబాద్ అన్‌క్యాప్డ్ ప్లేయర్లపైనే ఎక్కువ దృష్టి పెట్టింది. అయితే వేలం తర్వాత బ్యాటింగ్ విభాగం బలంగా తయారైనా.. బౌలింగ్ లోని లోపాలను విశ్లేషకులు ఎత్తి చూపుతున్నారు. అనుభవజ్ఞులైన బౌలర్లను తీసుకోకపోవడంపై మాజీ ఆటగాళ్లు అసహనం వ్యక్తం చేస్తున్నారు. సన్‌రైజర్స్ హైదరాబాద్ జట్టులో పవర్‌ప్లే బౌలింగ్ సమస్యగా ఉందని.. అందుకోసం ఆకాశ్ దీప్ లేదా ఆకిబ్ నబీ దార్‌ను తీసుకుంటే బాగుండేదని అభిప్రాయపడ్డారు. ఐపీఎల్ 2026 మినీ వేలంలో సన్‌రైజర్స్ హైదరాబాద్ అన్‌క్యాప్డ్ ప్లేయర్లపైనే ఎక్కువ ఆసక్తి చూపించింది. లియామ్ లివింగ్ స్టోన్, శివమ్ మావి తప్పా.. మిగతా 8 మంది అనామక ప్లేయర్లను తీసుకుంది. ముగ్గురు ప్లేయర్లు తప్పా అందరినీ ప్రారంభ ధరలకే కొనుగోలు చేసింది. అయితే వేలం తర్వాత ఎస్ఆర్‌హెచ్ బ్యాటింగ్ లైనప్ బలంగా తయారైందని విశ్లేషణలు వెలువడుతున్నాయి. ట్రావిస్ హెడ్, అభిషేక్ శర్మ, ఇషాన్ కిషన్, హెన్రిచ్ క్లాసెన్, లియామ్ లివింగ్‌స్టోన్ వంటి పవర్ హిట్టర్లతో కూడిన ఈ బ్యాటింగ్ విభాగంతో 300 పరుగులు సాధించే అవకాశం ఉందని అభిమానులు భావిస్తున్నారు. అయితే హైదరాబాద్ బౌలింగ్ లైనప్‌లో మైనస్ పాయింట్లను విశ్లేషకులు ఎత్తి చూపుతున్నారు. వేలంలో ఎస్ఆర్‌హెచ్ ప్రవర్తించిన తీరుపై విమర్శలు చేస్తున్నారు. టీమ్ ఇండియా మాజీ ఓపెనర్ అభినవ్ ముకుంద్ కూడా సన్‌రైజర్స్ హైదరాబాద్ వ్యవహరించిన తీరుపై అసహనం వ్యక్తం చేశాడు. ఐపీఎల్ 2026 మినీ వేలంలో అనుభవం కలిగిన బౌలర్ ఆకాశ్ దీప్‌ను ఎందుకు తీసుకోలేదని ప్రశ్నించాడు. ఈ సందర్భంగా పవర్ ప్లేలో బౌలింగ్ చేయడానికి హైదరాబాద్ ఇబ్బంది పడుతోందని అన్నాడు. అయితే వేలంలో ఆకాశ్ దీప్ లేదా ఆకిబ్ నబీ దార్‌ను తీసుకుంటే.. బౌలింగ్ లైనప్ మరింత బలంగా మారేదని అభిప్రాయం వ్యక్తం చేశాడు. SRH ప్రధాన సమస్య అదే.. "SRH ప్రధాన సమస్య పవర్‌ప్లే బౌలింగ్. ఇప్పటికే జట్టులో హర్షల్, ఉనద్కత్ ఉన్నారు. అయితే న్యూ బాల్ ఆప్షన్ కోసం ఈశాన్ మలింగపై ఒత్తిడి తేవాల్సి వస్తుంది. అయితే నేను వేలంలో ఉంటే ఆకిబ్ కోసం గట్టిగా ప్రయత్నించే వాడిని. చివరికి ఎస్ఆర్‌హెచ్ వద్ద చాలా డబ్బు ఉంది. అయినా ఆకాష్ దీప్ లాంటి ఆటగాడి కోసం కూడా మీరు ఎందుకు పోటీ పడలేదు?" అని ముంకుంద్ ప్రశ్నించాడు. సన్‌రైజర్స్ కాకుండా ఢిల్లీ క్యాపిటల్స్ కూడా పవర్‌ప్లే బౌలర్స్ కరువయ్యారని భారత మాజీ ఆల్‌రౌండర్ సంజయ్ బంగర్ అభిప్రాయపడ్డాడు. ఆకిబ్ దార్‌ను కొనుగోలు చేసినా.. జట్టులో ఈ సమస్య ఉంటుందని అన్నాడు. సన్‌రైజర్స్ హైదరాబాద్ జట్టు.. బ్యాటర్లు.. ఇషాన్ కిషన్, అనికేత్ వర్మ, సమరన్ రవిచంద్రన్, సలిల్ అరోరా (కీపర్), హెన్రిచ్ క్లాసెన్ (కీపర్), ట్రావిస్ హెడ్ ఆల్‌రౌండర్లు.. హర్షల్ పటేల్, కమిందు మెండిస్, హర్ష్ దుబే, బ్రైడన్ కార్స్, అభిషేక్ శర్మ, నితీశ్ కుమార్ రెడ్డి, బ్రైడన్ కార్స్, శివాంగ్ కుమార్, క్రెయిన్స్ ఫులెత్రా, లియామ్ లివింగ్ స్టోన్, జాక్ ఎడ్వర్డ్స్ బౌలర్స్.. పాట్ కమిన్స్ (కెప్టెన్), జీషన్ అన్సారీ, జయదేవ్ ఉనద్కత్, ఈషాన్ మలింగ, షకీబ్ హుస్సేన్, ఓంకార్ తార్మాలే, అమిత్ కుమార్, ప్రఫుల్ హింగే, శివమ్ మావి.