పెళ్లికి క్యాస్ట్ కావాలి.. అక్రమ సంబంధాలకి అక్కర్లేదా?...

హైపర్ ఆది షాకింగ్ కామెంట్స్

జై భీమ్ టీవీ - సినిమా / : జబర్దస్త్ కమెడియన్ హైపర్ ఆది తాజాగా ఓ యూట్యూబ్ పాడ్‌కాస్ట్‌లో చేసిన వ్యాఖ్యలు సోషల్ మీడియాలో వైరల్‌గా మారాయి. కుల భావనను తాను ఎప్పటి నుంచో నమ్మనని, అవసరాల సమయంలో కులానికి ఎలాంటి ప్రాధాన్యం ఉండదని ఆది స్పష్టం చేశాడు. సమాజంలో పెరుగుతున్న పరువు హత్యలపై కూడా తీవ్రంగా స్పందించాడు. వేరే కులాన్ని ప్రేమించారనే కారణంతో ప్రాణాలు తీస్తుండటాన్ని ఆయన ఖండించాడు. ప్రేమతో కలిసి జీవించగలిగితే వారికి అండగా నిలవాలన్నదే సరైన దారి అని అభిప్రాయపడ్డాడు. జబర్దస్త్ వేదిక నుంచి సినీ రంగం వరకు తనదైన శైలితో గుర్తింపు తెచ్చుకున్న కమెడియన్లలో హైపర్ ఆది ఒకరు. స్టేజ్ మీద తన టైమింగ్‌, డైలాగ్ డెలివరీతో ప్రేక్షకులను నవ్వించడమే కాకుండా, సోషల్ ఇష్యూస్‌పై కూడా ఓపెన్‌గా మాట్లాడే వ్యక్తిగా ఆయనకు పేరుంది. తాజాగా ఇచ్చిన ఓ పాడ్‌కాస్ట్‌ ఇంటర్వ్యూలో హైపర్ ఆది చేసిన వ్యాఖ్యలు ఇప్పుడు సోషల్ మీడియాలో పెద్ద చర్చకు దారి తీస్తున్నాయి. ఆ ఇంటర్వ్యూలో ముఖ్యంగా క్యాస్ట్ ఫీలింగ్ , సమాజంలో జరుగుతున్న పరువు హత్యల అంశాలపై హైపర్ ఆది తన అభిప్రాయాన్ని స్పష్టంగా వెల్లడించాడు. తాను ఎప్పటినుంచో కుల వ్యవస్థను నమ్మనని, కాలేజ్ రోజుల నుంచే ఆ భావన తనకు నచ్చలేదని ఆది చెప్పాడు. కులం పేరుతో మనుషులను విభజించడం వల్ల సమాజానికి ఏ విధమైన ఉపయోగం ఉండదని అభిప్రాయపడ్డాడు. అవసరం వచ్చినప్పుడు కులం పని చేయదని, కష్ట సమయంలో మనిషికి మనిషే అవసరమని వ్యాఖ్యానించాడు. మన రోజువారీ జీవితంలో అవసరాన్ని బట్టి నిర్ణయాలు తీసుకుంటామని, అప్పుడు కులం అనే అంశం అసలు గుర్తుకే రాదని ఆది అభిప్రాయపడ్డాడు. వైద్య సహాయం కావాలంటే డాక్టర్ కులం ఏమిటని అడగమని, ప్రాణాపాయ స్థితిలో ఉన్నప్పుడు సహాయం చేసే వ్యక్తి ఎవరో చూసి మాత్రమే స్పందిస్తామని వివరించాడు. అవసరాన్ని బట్టి కులాన్ని ఉపయోగించుకోవడం సరైన దృక్పథం కాదని, ఇది సమాజాన్ని మరింత వెనక్కి నెట్టేస్తుందని అన్నాడు. ఇక పరువు హత్యల విషయంపై హైపర్ ఆది చేసిన వ్యాఖ్యలు మరింత చర్చకు కారణమయ్యాయి. వేరే కులానికి చెందిన వ్యక్తిని ప్రేమించాడనే కారణంతో హత్యలు చేయడం ఎంతటి దారుణమో ఆలోచించాలన్నారు. ఈ రోజుల్లో పెళ్లి సంబంధాల విషయంలో మాత్రం కులాన్ని ముందుకు తెస్తారని, కానీ అక్రమ సంబంధాల విషయంలో మాత్రం కులం అడ్డుకాదన్న ద్వంద్వ వైఖరిని ఆది ప్రశ్నించాడు. నిజమైన ప్రేమతో ఇద్దరు జీవితాంతం కలిసి ఉండగలరని అనిపిస్తే, వారికి అండగా నిలవాల్సిన బాధ్యత కుటుంబాలపై ఉందని అభిప్రాయపడ్డాడు. అబ్బాయి ఆర్థికంగా స్థిరంగా లేకపోతే, అతడిని ప్రోత్సహించి నిలబడే అవకాశమివ్వాలని, ఉద్యోగం లేదా స్థిరత్వం వచ్చిన తర్వాత పెళ్లి చేయొచ్చని చెప్పడం సరైన మార్గమని సూచించాడు. కానీ చిన్న విషయాలకే ప్రాణాలు తీసేంత తీవ్రతకు వెళ్లడం సమాజానికి ఏ విధంగా హాని చేస్తుందో ఆలోచించాల్సిన అవసరం ఉందని ఆది పేర్కొన్నాడు. ఒక నిమిషం ఆలోచిస్తే పరిష్కారం దొరికే సమస్యకు హింస ఎందుకు అనే ప్రశ్నను ఆయన లేవనెత్తాడు. ఈ వ్యాఖ్యలు బయటకు రావడంతో నెటిజన్లు విభిన్న అభిప్రాయాలు వ్యక్తం చేస్తున్నారు. కొందరు హైపర్ ఆది ధైర్యంగా నిజాలు మాట్లాడాడని మద్దతు తెలుపుతుంటే, మరికొందరు ఇది వ్యక్తిగత అభిప్రాయమని పేర్కొంటున్నారు. ఏదేమైనా ఆయన మాటలు సమాజంలో జరుగుతున్న కొన్ని చేదు నిజాలపై మరోసారి చర్చ మొదలయ్యేలా చేశాయి. హైపర్ ఆది అసలు పేరు కోట ఆదయ్య. ఆంధ్రప్రదేశ్‌లోని ప్రకాశం జిల్లా చీమకుర్తిలో సాధారణ రైతు కుటుంబంలో జన్మించిన ఆయన బీటెక్ పూర్తి చేసిన తర్వాత కొంతకాలం సాఫ్ట్‌వేర్ ఉద్యోగిగా పని చేసి నటనపై ఆసక్తితో షార్ట్ ఫిలిమ్స్ వైపు మళ్లాడు. జబర్దస్త్ షోలో స్క్రిప్ట్ రైటర్‌గా ప్రయాణం మొదలుపెట్టిన ఆది.. అదిరే అభి టీమ్‌లో నటుడిగా గుర్తింపు తెచ్చుకుని ఆ తర్వాత టీమ్ లీడర్‌గా ఎదిగాడు. 2017లో ‘రారండోయ్ వేడుక చూద్దాం’ సినిమాతో సినీ రంగంలోకి అడుగుపెట్టిన హైపర్ ఆది, ప్రస్తుతం నటుడిగా, డైలాగ్ రైటర్‌గా బిజీగా కొనసాగుతున్నాడు.