ఏపీలో ఆ జాతీయ రహదారికి మహర్దశ..

ఆ ప్రాంతంలో 4 ఫ్లై ఓవర్లు, 14 అండర్‌పాస్‌లు

జై భీమ్ టీవీ - ఆంధ్ర ప్రదేశ్ / అనంతపూర్ జిల్లా : అనంతపురం మీదుగా వెళ్లే హైదరాబాద్-బెంగళూరు హైవే 44పై ప్రమాదాలు తగ్గించేందుకు NHAI భారీ ప్రణాళిక సిద్ధం చేసింది. రూ.600 కోట్లతో 14 అండర్‌పాస్‌లు, 4 ఫ్లైఓవర్లు, ఒక ఫుట్‌ఓవర్ బ్రిడ్జి నిర్మించనున్నారు. దీంతో పాటు నేషనల్ హైవే 44పై ఉన్న ఆక్రమణలను తొలగించే పని కూడా మొదలైంది.. ఇప్పటికే నోటీసులు ఇచ్చారు. ఈ చర్యలతో ప్రయాణికులకు భద్రత పెరిగి, ప్రయాణం సులభతరం కానుంది. ఆంధ్రప్రదేశ్‌ మీదుగా వెళ్లే జాతీయ రహదారులపై భద్రత, ప్రమాదాల నివారణ దిశగా అడుగులు పడుతున్నాయి. ఈ హైవేలలో అవసరమైన చోట్ల కొత్తగా అండర్ పాస్‌ బ్రిడ్జిలు, ఫ్లైఓవర్లను నిర్మిస్తున్నారు. తాజాగా అనంతపురం జిల్లా మీదుగా వెళ్లే హైదరాబాద్-బెంగళూరు జాతీయ రహదారి 44పై అవసరమైన నిర్మాణాలను చేపట్టాలని నిర్ణయం తీసుకున్నారు. NHAI (నేషనల్ హైవే అథారిటీ ఆఫ్ ఇండియా) కీలక చర్యలు చేపట్టింది. ఈ జాతీయ రహదారిపై ప్రమాదాలు ఎక్కువగా జరుగుతున్న ప్రాంతాలను (బ్లాక్‌స్పాట్స్) గుర్తించి.. అవసరమైన చోట్ల అండర్‌పాస్‌ బ్రిడ్జిలు, ఫ్లైఓవర్‌లు నిర్మించనున్నారు. ఈ మేరకు రూ.600 కోట్ల నిధులు మంజూరయ్యాయి. ఈ నిధులతో మొత్తం 14 అండర్‌పాస్‌ బ్రిడ్జిలు, 4 ఫ్లైఓవర్‌లు నిర్మించాలని నిర్ణయం తీసుకున్నారు. అనంతపురం దగ్గర ప్రజలు నడిచేందుకు వీలుగా ఒక ఫుట్‌ఓవర్ బ్రిడ్జిని కూడా నిర్మించనున్నారు. రాప్తాడు, సోమందేపల్లి, తపోవనం, కోడూరు దగ్గర 4 ఫ్లైఓవర్‌ బ్రిడ్జిలను నిర్మించనున్నారు. ఈ నిర్మాణాల కోసం డీపీఆర్‌ కూడా సిద్ధం చేస్తున్నారు. ఈ బ్రిడ్జిల నిర్మాణం పూర్తయితే, వాహనాల రాకపోకలు సజావుగా సాగడంతో పాటు, రోడ్డు ప్రమాదాలు గణనీయంగా తగ్గుతాయని అధికారులు భావిస్తున్నారు. ఈ చర్యల వల్ల ప్రయాణికులకు భద్రత పెరిగి, ప్రయాణం మరింత సౌకర్యవంతంగా మారుతుంది. నేషనల్ హైవే 44పై ఆక్రమణల తొలగింపు ప్రక్రియ మరోవైపు ఈ జాతీయ రహదారి 44పై పెద్ద, పెద్ద హోటల్స్ ప్రసన్నాయపల్లి దగ్గర స్థలాన్ని ఆక్రమించాయి.. నిర్మాణాలు చేశారు. ఈ మేరకు ఆ హోటళ్ల యజమానులకు అధికారులు నోటీసులు ఇచ్చారు. ఈ ఆక్రమణల్ని కూడా తొలగించాలని ప్రయత్నించారు.. జేసీబీలతో వెళ్లారు. అయితే హోటళ్ల యాజమాన్యాలు కొంత గడువు కోరారు.. మరికొందరు తమకు అసలు నోటీసులే రాలేదని చెప్పడ కొసమెరుపు. కొంతమంది మాత్రం కోర్టును ఆశ్రయించారు. ప్రసన్నాయపల్లితో పాటుగా కోడూరు, సోములదొడ్డి దగ్గర కూడా ఆక్రమణలు ఉన్నాయని గుర్తించారు.. వారికి కూడా నోటీసులు ఇచ్చారు. ఇలా నేషనల్ హైవే అథారిటీ ఆఫ్ ఇండియాకు సంబంధించి జాతీయ రహదారిపై ఉన్న స్థలాలను ఆక్రమించిన వారిపై చర్యలకు సిద్ధమవుతున్నారు.