‘భగవంత్ కేసరి’ థియేటర్ల వద్ద అభిమానుల రచ్చ.. బాలయ్య కటౌట్‌కు అభిషేకం.. పాలతో కాదు..
జై భీమ్ టీవీ - సినిమా / : తమ అభిమాన హీరో సినిమా విడుదల రోజున అభిమానులు చేసుకునే సంబరాల గురించి చెప్పక్కర్లేదు. థియేటర్లను అలంకరించి, భారీ కటౌట్స్ ఏర్పాటు చేసి.. వాటికి పూలమాలలు వేసి.. తమ హీరో సినిమా విడుదల రోజును పెద్ద పండగలా జరుపుకుంటారు. ముఖ్యంగా సౌత్ ఇండస్ట్రీలో ఇలాంటి సంఘటనలు చాలా చూస్తుంటాం. తెలుగులోనే కాదు.. తమిళంలోనూ ఫ్యాన్స్ చేసే రచ్చ గురించి తెలిసిందే. ఈరోజు లియో విడుదల సందర్భంగా తమిళనాడులో విజయ్ ఫ్యాన్స్ చేసిన హడావిడి గురించి చూశాం. రోడ్లుపై వందల సంఖ్యలో కొబ్బరికాయలు కొట్టి తమ అభిమానాన్ని చాటుకున్నారు. ఇటు తెలుగు రాష్ట్రాల్లోనూ భగవంత్ కేసరి సినిమా విడుదల సందర్భంగా అభిమానులు చేసిన సందడికి సంబంధించిన వీడియోస్ ఇప్పుడు నెట్టింట వైరలవుతున్నాయి. గతంలో ప్రభాస్, పవన్ కళ్యాణ్, చరణ్ సినిమాల విడుదల సందర్భంగా తమ హీరోస్ కటౌట్లకు పాలాభిషేకం చేసిన సంగతి తెలిసిందే. కానీ ఇప్పుడు నందమూరి అభిమానులు మాత్రం తమ అభిమానాన్ని చూపించిన విధానం చూసి ఆశ్చర్యపోతున్నారు నెటిజన్స్. నందమూరి బాలకృష్ణ నటించిన ‘భగవంత్ కేసరి’ ఈరోజు విడుదలైంది. అభిమానులు తమ అభిమాన నటుడి సినిమాను ఉత్సాహంగా స్వాగతించారు. ఈ క్రమంలోనే కొన్ని చోట్ల బాలకృష్ణ కటౌట్‌కు పాలు, పెరుగుతో అభిషేకం కాకుండా కొందరు అభిమానులు ఆల్కహాల్ తో అభిషేకం చేశారు. అది కూడా మ్యాన్షన్ హౌస్ బ్రాండ్ తో అభిషేకం చేశారు. అయితే ఇది తెలుగు రాష్ట్రాల్లో కాదు కర్ణాటకలోనే జరిగినట్లుగా తెలుస్తోంది. నందమూరి బాలకృష్ణ నటించిన ‘భగవంత్ కేసరి’ చిత్రం బెంగుళూరులోని వినాయక్ థియేటర్‌లో విడుదలైంది. తెల్లవారుజామున నాలుగు గంటలకు తొలి షో వేశారు. ఈ సమయంలో కొందరు బాలకృష్ణ అభిమానులు నందమూరి బాలకృష్ణ కటౌట్‌పై అల్కహాల్ తో అభిషేకం చేసి సంబరాలు చేసుకున్నారు. ఇందుకు సంబంధించిన వీడియోస్ నెట్టింట వైరలవుతున్నాయి. అదే సమయంలో కొబ్బరికాయలపై కర్పూరం వెలిగించి హారతి ఇస్తూ్ సినిమాకు స్వాగతం పలికారు. టపాసులు పేల్చి ‘జై బాలయ్య, జై జై బాలయ్య’ అంటూ నినాదాలు చేశారు. తండ్రీ కూతుళ్ల సెంటిమెంట్ తో తెరకెక్కిన ఈ యాక్షన్ డ్రామాలో శ్రీలీల, కాజల్ నటించారు. అలాగే బాలీవుడ్ నటుడు అర్జున్ రాంపాల్, శరత్ కుమార్ కీలకపాత్రలు పోషించారు. ఈ చిత్రాన్ని షైన్ స్క్రీన్ ప్రొడక్షన్స్ నిర్మించింది. ఎస్ థమన్ ఈ చిత్రానికి సంగీతం అందించారు.
Admin
మరిన్ని వార్తలు
Developed By :
