2036 ఒలింపిక్స్ నిర్వహించేందుకు భారత్ సిద్ధం.. ఐఓసీ సభలో ప్రధాని మోదీ
జై భీమ్ టీవీ - జాతియం / : శనివారం సాయంత్రం ముంబైలో జరిగిన 141వ అంతర్జాతీయ ఒలింపిక్ కమిటీ సమావేశాన్ని ప్రధాని నరేంద్ర మోదీ ప్రారంభించారు. ఈ సందర్భంగా ప్రసంగించిన ఆయన.. 2036 సంవత్సరంలో ఒలింపిక్స్‌ను నిర్వహించే విషయంలో భారత్ ఎలాంటి అవకాశాన్ని వదులుకోబోదని స్పష్టం చేశారు ప్రధాని నరేంద్ర మోదీ. 40 ఏళ్ల విరామం తర్వాత భారత్‌లో అంతర్జాతీయ ఒలింపిక్ కమిటీ సెషన్‌ను నిర్వహించడం గర్వించదగ్గ విషయమని ప్రధాని మోదీ అన్నారు. శనివారం సాయంత్రం, జియో వరల్డ్ సెంటర్‌లో 141వ అంతర్జాతీయ ఒలింపిక్ కమిటీ (IOC) సెషన్‌ ప్రారంభించారు. ఈ సందర్భంగా ప్రసంగించిన ప్రధాని మోదీ.. ఒలింపిక్స్‌ను నిర్వహించేందుకు భారత్ ఎంతో ఉత్సాహంగా ఉందని అన్నారు. 2036లో ఒలింపిక్స్‌ను సిద్ధం చేయడంలో, విజయవంతంగా నిర్వహించడంలో భారత్ ఎలాంటి అవకాశాన్ని వదులుకోదని చెప్పారు. ఒలింపిక్స్ నిర్వహించడం దేశంలోని 140 కోట్ల మంది భారతీయుల చిరకాల స్వప్నమని అన్నారు. 2029లో జరిగే యూత్‌ ఒలింపిక్స్‌ను నిర్వహించేందుకు భారత్ కూడా ఎంతో ఆసక్తిగా ఉందన్నారు. అంతర్జాతీయ ఒలింపిక్ కమిటీ సపోర్ట్, ప్రోత్సాహం భారత్‌కు ఉంటుందని ప్రధాని మోదీ విశ్వాసం వ్యక్తం చేశారు. ఇక ఈ సందర్భంగా అంతర్జాతీయ ఒలింపిక్ కమిటీ ఒలింపిక్స్‌లో క్రికెట్‌ను చేర్చడంపై ప్రధాని మాట్లాడుతూ.. ఒలింపిక్స్‌లో క్రికెట్‌ను చేర్చాలని అంతర్జాతీయ ఒలింపిక్ కమిటీ ఎగ్జిక్యూటివ్ బోర్డు సిఫారసు చేయడం అందరికీ సంతోషాన్ని కలిగిస్తోందన్నారు. త్వరలో సానుకూల వార్తలు వస్తాయని ఆశిస్తున్నామని చెప్పుకొచ్చారు. ఇదే సమయంలో అహ్మదాబాద్ వేదికగా జరిగిన వన్డే వరల్డ్ కప్ టోర్నీ మ్యాచ్‌లో పాకిస్తాన్‌పై టీమిండియా చారిత్రాత్మక విజయం సాధించిన టీమిండియాకు అభినందనలు తెలిపారు ప్రధాని. క్రికెట్ మ్యాచ్‌లో టీమిండియా అద్భుత విజయం సాధించిందన్నారు. భారతీయ సంస్కృతిలో క్రీడలు ఒక ముఖ్యమైన భాగం అని, భారతదేశంలోని గ్రామాలకు వెళితే, క్రీడలు లేకుండా ప్రతి పండుగ అసంపూర్తిగా ఉంటుందన్నారు. భారతీయులమైన మనం క్రీడా ప్రేమికులమే కాదు, దానిని జీవించే వారము కూడా అని వ్యాఖ్యానించారు. అంతకుముందు, ఢిల్లీ నుంచి ముంబై చేరుకున్న ప్రధాని మోదీకి విమానాశ్రయంలో మహారాష్ట్ర ముఖ్యమంత్రి ఏక్‌నాథ్ షిండే, డిప్యూటీ సీఎం అజిత్ పవార్, డిప్యూటీ సీఎం దేవేంద్ర ఫడ్నవీస్ స్వాగతం పలికారు. మహారాష్ట్రలో నెలకొన్న రాజకీయ పరిస్థితుల దృష్ట్యా ప్రధాని మోదీ పర్యటన చాలా కీలకంగా మారింది.
Admin
మరిన్ని వార్తలు
.png)
.jpg)
.jpg)
Developed By :
