జై భీమ్ టీవీ - జాతియం / : రాజస్థాన్ అసెంబ్లీ ఎన్నికల వేళ కాంగ్రెస్ నేతల నివాసాల్లో ఈడీ సోదాలు సంచలనం రేపాయి. ఫెమా ఉల్లంఘన కేసులో ఏకంగా.. రాజస్థాన్ ముఖ్యమంత్రి అశోక్ గెహ్లాట్ తనయుడు వైభవ్కను విచారణకు హాజరు కావాలని ఇన్ఫోర్స్మెంట్ డైరక్టరేట్ సమన్లు జారీ చేసింది. అటు.. పశ్చిమ బెంగాల్లోనూ మంత్రి జ్యోతి ప్రియ ఇంట్లో ఈడీ రైడ్స్ చేయడం కలకలం సృష్టించింది. అసెంబ్లీ ఎన్నికల వేళ రాజస్థాన్ కాంగ్రెస్ నేతల ఇళ్లపై ఈడీ దాడులు తీవ్ర సంచలనం రేపుతున్నాయి. పేపర్ లీక్ కేసులో రాజస్థాన్ కాంగ్రెస్ చీఫ్ గోవింద్ సింగ్ డోటాస్రా, మహువా నుంచి పోటీ చేస్తున్న కాంగ్రెస్ అభ్యర్థి నివాసాల్లో ఈడీ అధికారులు తనిఖీలు చేపట్టారు. అదే సమయంలో రాజస్థాన్ సీఎం అశోక్ గెహ్లాట్ కుమారుడు వైభవ్కు ఈడీ సమన్లు జారీ చేసింది. ఫెమా నిబంధనల ఉల్లంఘనలకు సంబంధించిన కేసులో వైభవ్ను ప్రశ్నించేందుకు హాజరు కావాలని ఈడీ నోటీసులు ఇచ్చింది. పేపర్ లీక్కు సంబంధించి మనీలాండరింగ్ కేసు దర్యాప్తులో భాగంగా కాంగ్రెస్ నేతల ఇళ్లల్లో ఈడీ సోదాలు చేపట్టింది. మొత్తం ఏడు ప్రాంతాల్లో ఏకకాలంలో సోదాలు చేపట్టినట్లు ఈడీ వర్గాలు వెల్లడించాయి. ఇదిలావుంటే.. అసెంబ్లీ ఎన్నికల్లో ఓటమి భయంతోనే బీజేపీ ఈడీ దాడులు చేయిస్తోందని కాంగ్రెస్ ఆరోపించింది. ఈడీ దాడులను నిరసిస్తూ కాంగ్రెస్ కార్యకర్తలు ఆందోళన చేపట్టారు. ఈడీ దాడులపై మండిపడ్డారు రాజస్థాన్ సీఎం అశోక్ గెహ్లాట్. గతంలో కర్నాటక ఎన్నికల సమయంలో పీసీసీ చీఫ్ డీకే శివకుమార్ నివాసంలో ఈడీ సోదాలు చేసిందని, అప్పుడు కాంగ్రెస్ గెలిచిందన్నారు గెహ్లాట్. ఇప్పుడు రాజస్థాన్లోనూ కాంగ్రెస్ గెలుస్తుందన్నారు. రేషన్ స్కామ్లో 8 చోట్ల ఈడీ సోదాలు మరోవైపు.. రేషన్ పంపిణీలో అవినీతికి సంబంధించిన ఆరోపణలపై పశ్చిమ బెంగాల్ మంత్రి జ్యోతిప్రియ మల్లిక్ నివాసంలోనూ ఈడీ దాడులు చేసింది. రేషన్ స్కామ్లో ఎనిమిది చోట్ల సోదాలు నిర్వహించారు ఈడీ అధికారులు. ఇక.. ప్రతిపక్షాలను దెబ్బతీయడం కోసమే బీజేపీ కేంద్ర దర్యాప్తు సంస్థల్ని తన రాజకీయ లబ్ది కోసం వినియోగించుకుంటోందని ఆరోపించారు బెంగాల్ సీఎం మమతా బెనర్జీ. ఎన్నికలకు ముందు దేశవ్యాప్తంగా ప్రతిపక్ష పార్టీల నేతలపై ఈడీ దాడుల చేయిస్తూ.. బీజేపీ.. డర్టీ గేమ్ ఆడుతోందని మండిపడ్డారు దీదీ. అయితే.. మమతాబెనర్జీ వ్యాఖ్యలను ఖండించారు బెంగాల్ బీజేపీ చీప్ సుఖంతా మజుందార్. మొత్తంగా.. రాజస్థాన్, పశ్చిమబెంగాల్లో ఈడీ రైడ్స్ దేశవ్యాప్తంగా కలకలం రేపుతున్నాయి.
Admin