నిజాం కాలేజీలో ఉద్రిక్తత, పలువురు విద్యార్థులు అరెస్ట్
జై భీమ్ టీవీ - తెలంగాణ / వరంగల్ జిల్లా : బషీర్ బాగ్ లోని నిజాం కాలేజీలో ఉద్రిక్తత నెలకొంది. తమ సమస్యను పరిష్కరించాలంటూ ప్రిన్సిపాల్ చాంబర్ లో నిరసనకు దిగిన విద్యార్థులను పోలీసులు అరెస్ట్ చేశారు. నూతనంగా నిర్మించిన హాస్టల్ ను అండర్ గ్రాడ్యువేట్ గర్ల్స్ కు కేటాయించాలంటూ.. విద్యార్థులు చాంబర్ లో ప్రిన్సిపాల్ ను కలిసి అడిగారు. అయితే.. నూతనంగా నిర్మించిన హాస్టల్ ను పీజీ విద్యార్థులకు కేటాయించాలని తమకు ఆర్డర్స్ ఇచ్చారని ప్రిన్సిపాల్ చెప్పడంతో విద్యార్థులు ఆందోళనకు దిగారు. ఈ విషయంపై స్పష్టత ఇవ్వాలని, తమకు నూతనంగా నిర్మించిన హాస్టల్ ను కేటాయించాలని వేడుకున్నారు. దూర ప్రాంతాల నుండి వచ్చిన తమకు హాస్టల్ కేటాయించాలని ప్రిన్సిపాల్ ను కోరారు. ఈ క్రమంలోనే ప్రిన్సిపాల్ చాంబర్ లో విద్యార్థులు బైఠాయించి.. నిరసన తెలిపారు. ఫిర్యాదు అందుకున్న పోలీసులు వెంటనే నిజాం కాలేజీకి వెళ్లారు. ప్రిన్సిపాల్ చాంబర్ లో నిరసనకు దిగిన విద్యార్థులను అడ్డుకుని అరెస్ట్ చేసేందుకు ప్రయత్నించారు. తమను అరెస్ట్ చేయడాన్ని కొందరు విద్యార్థులు తప్పుపట్టారు. తాము ఏ తప్పు చేశామని అరెస్ట్ చేస్తున్నారని ప్రశ్నించారు. ఈ క్రమంలోనే పోలీసులకు విద్యార్థుల మధ్య తీవ్ర వాగ్వివాదం, తోపులాట జరిగింది. దీంతో కొందరు విద్యార్థులు స్పల్పంగా గాయపడ్డారు. పరిస్థితి ఉద్రిక్తంగా మారడంతో విద్యార్థులను అరెస్ట్ చేసి, స్టేషన్ కు తరలించారు. మరోవైపు కొందరు పోలీసులు తమ పట్ల దురుసుగా ప్రవర్తించారని విద్యార్థులు ఆరోపిస్తున్నారు. సమస్యను పరిష్కరించాలని కోరుతున్న తమను అరెస్ట్ చేయడం ఎంత వరకు సమంజసం అని ప్రశ్నిస్తున్నారు. మరోవైపు కొంతమంది విద్యార్థులపై పోలీసులు చేయ్యి చేసుకున్నారని తెలుస్తోంది.
Admin
మరిన్ని వార్తలు
.jpg)
Developed By :
