హైదరాబాద్లో నేడు ట్రాఫిక్ ఆంక్షలు.. ఏయే ప్రాంతాల్లో, ఏ సమయంలో..
జై భీమ్ టీవీ - తెలంగాణ / : దీపావళి వేడుకలు అంగరంగ వైభవంగా ముగిశాయి. దేశంలోని పలు ప్రధాన పట్టణాలతో పాటు రెండు తెలుగు రాష్ట్రాల్లోనూ పండగ వేడుకలు ఘనంగా జరిగాయి. ఇదిలా ఉంటే దీపావళి వేడుకలు ముగిసిన వెంటనే హైదరాబాద్లో జరిగే సదర్ వేడుకలకు ఉన్న క్రేజ్‌ ఎలాంటిదో ప్రత్యేకంగా చెప్పాల్సిన పనిలేదు. దీపావళి తర్వాతి రోజు జరిగే ఈ వేడుకల్లో యాదవులు పెద్ద ఎత్తున హాజరై సంబురంగా జరుపుకుంటారు. దున్నపోతులను ఆడిస్తూ సందడి చేస్తారు. ఈ వేడుకలను చూడడానికి తెలుగు రాష్ట్రాలతో పాటు ఇతర రాష్ట్రాలకు చెందిన వారు కూడా హాజరవుతుంటారు. సదర్ ఉత్సవాల్లో దున్నపోతులను ముస్తాబు చేసి, విన్యాసాలు చేస్తుంటారు. ఇందుకోసం హరియాణా, గుజరాత్ రాష్ట్రాలకు చెందిన దున్నపోతుల్ని నగరానికి తీసుకువస్తారు. ప్రతీ ఏడాదిలాగే ఈసారి కూడా సదర్ వేడుకలకు హైదరాబాద్ మహానగరం ముస్తాబైంది. ఇప్పటికే అన్ని రకాల ఏర్పాట్లు పూర్తి చేసుకున్నారు. మంగళవారం సాయంత్రం సదర్ వేడుకలు జరగనున్నాయి. ఈ నేపథ్యంలో హైదరాబాద్లో ఈరోజు (మంగళవారం) ట్రాఫిక్ ఆంక్షలను విధించారు. నగరంలోని పలు మార్గాల్లో వాహనాలను దారి మళ్లిస్తూ నిర్ణయం తీసుకున్నారు. మంగళవారం రాత్రి 7 గంటల నుంచి బుధవారం తెల్ల వారుజామున 3 గంటల వరకు ఈ ట్రాఫిక్ ఆంక్షలు అమల్లో ఉండనున్నాయి. ప్రయాణికులు, వాహనదారులు పోలీసులు సూచించిన ప్రత్యామ్నాయ మార్గాల్లో వెళ్లి తమకు సహకరించాలని తెలిపారు. ఈ మార్గాల్లో ట్రాఫిక్ ఆంక్షలు.. * కాచిగూడ ఎక్స్‌ రోడ్‌ నుంచి వైఎంసియే రూట్‌లో వచ్చే వాహనాలు టూరిస్ట్ హోటల్ రోడ్‌ వైపు మళ్లించనున్నారు. * ఇక విఠల్ వాడి క్రాస్ రోడ్స్ నుంచి వచ్చే వాహనాలను.. భవాన్స్ న్యూ సైన్స్ కాలేజీ, కింగ్ కోటి మీదుగా మళ్లించనున్నారు. * ఇదిలా ఉంటే స్ట్రీట్ నంబర్ 8 నుంచి వైయంసియే వైపు వెహికిల్స్‌ను అనుమతించరు. ఆ దారిలో వచ్చే వాహనాలను రెడ్డి కాలేజ్ బహదూర్ పుర వైపు పంపిస్తారు. * ఇక ఓల్డ్ బర్కథ్ పుర పోస్ట్ ఆఫీస్ నుంచి వైయంసియే వైపు వాహనాలను అనుమతించరు. ఈ వాహనాలను క్రౌన్ కేఫ్, బాగ్ లింగంపల్లి వైపు మళ్లిస్తారు. అలాగే ఓల్డ్ ఎక్సైజ్ ఆఫీస్ నుంచి వచ్చే ట్రాఫిక్ ను విఠల్ వాడి వైపు మళ్లిస్తారు. * బర్కత్ పుర చమాన్ నుంచి వైయంసియే వైపునకు వచ్చే వాహనాలకు అనుమతి ఉండదు. ఈ మార్గంలో వచ్చే వాహనాలు.. బర్కత్ పుర క్రాస్ రోడ్స్, టూరిస్ట్ హోటల్ వైపు మళ్లిస్తారు. * ఇక బ్రిలియంట్ గ్రామర్ స్కూల్ నుంచి రెడ్డి కాలేజ్ వైపు వచ్చే వాహనాలు అనుమతించరు. ఈ దారిలో వచ్చే వాహనాలను నారాయణగూడ క్రాస్ రోడ్స్ వైపు మళ్లిస్తారు. * సికింద్రబాద్ నుంచి కింగ్ కోటి వైపు వచ్చే ఆర్టీసీ బస్సులను నారాయణగూడ క్రాస్ రోడ్స్, బార్కత్ పుర, బాగ్ లింగంపల్లి, వియస్టి, మీదుగా మళ్లించనున్నారు. * సదర్ వేడుకకు హాజరయ్యే వారి వాహనాలను శాంతి థియేటర్, రెడ్డి కాలేజ్, మెల్కొట్ పార్క్, దీపక్ థియేటర్ వద్ద పార్కింగ్ చేసుకునే అవకాశం కల్పించారు.
Admin
మరిన్ని వార్తలు
.jpg)
Developed By :
