కాంగ్రెస్ పార్టీకి పాల్వాయి స్రవంతి గుడ్ బై.. త్వరలోనే గులాబీ గూటికి..!
జై భీమ్ టీవీ - తెలంగాణ / : మునుగోడు నియోజకవర్గంలో కాంగ్రెస్ పార్టీకి షాక్ తగిలింది. దివంగత రాజ్యసభ సభ్యుడు పాల్వయి గోవర్ధన్‌రెడ్డి కుమార్తె, కాంగ్రెస్ కీలక నేత పాల్వాయి స్రవంతి ఆపార్టీకి రాజీనామా చేశారు. త్వరలో బీఆర్ఎస్ పార్టీలో చేరనున్నట్లు ప్రకటించారు. ఇటీవల మునుగోడు ఉప ఎన్నికల్లో కాంగ్రెస్ అభ్యర్థిగా పోటీ చేసిన స్రవంతి మారిన రాజకీయ పరిణామాలతో గులాబీ గూటికి చేరుతున్నట్లు వెల్లడించారు. తెలంగాణ అసెంబ్లీ ఎన్నికలకు సమయం దగ్గరపడుతున్న కొద్దీ రాజకీయాలు వేగంగా మారుతున్నారు. రాత్రి రాత్రే వీరు వారు, వారు వీరు అవుతున్నారు. ఉన్న ఫలంగా పార్టీ కండువాలు మార్చేస్తున్నారు. ఇటీవలె బీజేపీ వీడి కాంగ్రెస్ చేరిన కోమటిరెడ్డి రాజ్‌గోపాల్‌రెడ్డిని మునుగోడు కాంగ్రెస్ అభ్యర్థిగా ప్రకటించింది అధిష్టానం. దీంతో మునుగోడు టికెట్ అశించిన నేతలు ఒక్కొక్కరుగా కాంగ్రెస్ పార్టీ వీడుతున్నారు. ఇటీవల రేవంత్ రెడ్డి ముఖ్య అనుచరుడు మునుగోడుకు చెందిన చలమల్ల కృష్ణారెడ్డి పార్టీ వీడి బీజేపీలో చేరిపోయారు. తాజాగా పాల్వాయి స్రవంతి కూడా కాంగ్రెస్ పార్టీ వీడటంతో కార్యకర్తల్లో గందరగోళ పరిస్థితి నెలకొంది. ఇక స్రవంతి కాంగ్రెస్ పార్టీకి రాజీనామా చేయడంతో.. ఆమె పార్టీ మారుతున్నట్లు ప్రచారం జరిగింది. ఈ వార్తలు అవాస్తవమని ఇటీవల పాల్వాయి స్రవంతి కొట్టిపారేశారు. తాను కాంగ్రెస్‌లోనే ఉంటానని చెప్పారు. అయితే, తన పార్టీలో ప్రాధాన్యం తగ్గిందన్న మనస్తాపంతో కాంగ్రెస్ వీడుతున్నట్లు స్రవంతి తెలిపారు. ఇంతలోనే ఆమె కాంగ్రెస్‌కు రాజీనామా చేయడం చర్చనీయాంశంగా మారింది. అయితే త్వరలో అధికార పార్టీ బీఆర్‌ఎస్‌లో చేరనున్నట్టు తెలుస్తోంది. ఇవాళ లేదా రేపు మంత్రి కేటీ రామారావు సమక్షంలో గులాబీ కండువా కప్పుకోనున్నట్లు తెలుస్తోంది.
Admin
మరిన్ని వార్తలు
.jpg)
Developed By :
