జై భీమ్ టీవీ - తెలంగాణ / : తెలంగాణ అసెంబ్లీ దగ్గరపడుతున్న సమయంలో రాజకీయ పార్టీల్లో కీలక పరిణామాలు చోటుచేసుకుంటున్నాయి. అసంతృప్తితో ఉన్న నాయకులు, టికెట్ ఆశించి భంగపడిన నాయకులంతా పార్టీలు మారుతున్నారు. టీడీపీ సీనియర్ నేత, రాజ్యసభ మాజీ సభ్యుడు, తెలంగాణలో టీడీపీకి పెద్ద దిక్కుగా నిలిచిన రావుల చంద్రశేఖర్ రెడ్డి BRSలో చేరారు. ప్రస్తుతం ఆయన టీడీపీ పొలిట్బ్యూరో సభ్యుడిగా ఉన్నారు. ప్రత్యేక తెలంగాణ ఏర్పాటు తర్వాత తెలంగాణ టీడీపీ నేతలంతా బీఆర్ఎస్, కాంగ్రెస్లోకి వెళ్లినా రావుల మాత్రం టీడీపీలోనే కొనసాగారు. టీడీపీతో రావులకు దాదాపు 40 ఏళ్ల అనుబంధం ఉంది. ఇప్పుడు ఆ అనుబంధాన్ని తెంచుకొని బీఆర్ఎస్లో చేరారు. ప్రగతి భవన్లో సీఎం కేసీఆర్తో భేటీ అనంతరం రావుల చంద్రశేఖరరెడ్డి అనుచరులతో కలిసి నేరుగా తెలంగాణ భవన్ వచ్చారు. అక్కడ BRS వర్కింగ్ ప్రెసిడెంట్ KTR సమక్షంలో BRSలో చేరారు. రావుల వంటి సీనియర్ నేతకు కండువా కప్పడం తన అదృష్టమని కేటీఆర్ అన్నారు. రావులకు గులాబీ కండువా కప్పి ఆత్మీయ ఆలింగనం చేసుకున్నారు KTR. పదవుల కోసం తాను BRSలో చేరడం లేదని, ప్రజలకు సేవ చేసేందుకు BRS తగిన వేదికని తాను నమ్ముతున్నానని చేరిక సందర్భంగా రావుల అన్నారు. తెలంగాణ ఉద్యమకారుడు, భువనగిరికి చెందిన నాయకుడు జిట్టా బాలకృష్ణారెడ్డి కూడా BRSలో చేరారు. 14 ఏళ్ల వనవాసం ముగిసిందని జిట్టా అన్నారు. జిట్టా మళ్లీ BRSలో చేరడం సంతోషకరమని KTR అన్నారు. TRS ఆవిర్భావ సమయంలో ఆ పార్టీ యువజన విభాగం అధ్యక్షుడిగా జిట్టా పనిచేశారు. 2009 అసెంబ్లీ ఎన్నికల సమయంలో పొత్తులో భాగంగా టీడీపీకి భువనగిరి స్థానం దక్కడంతో BRSను జిట్టా విడిచిపెట్టారు. 2009, 2014, 2018 అసెంబ్లీ ఎన్నికల్లో వరుసగా ఇండిపెండెంట్గా పోటీ చేశారు. ఈ మధ్యలో ఆయన కాంగ్రెస్ పార్టీలో చేరారు, ఆ తర్వాత YSR కాంగ్రెస్లోకి వెళ్లారు. యువ తెలంగాణ అనే పార్టీని కూడా ఏర్పాటు చేశారు. ఆ పార్టీని బీజేపీలో విలీనం చేశారు. ఈ మధ్య బీజేపీ నుంచి సస్పెండ్ కావడంతో నెల క్రితమే మళ్లీ కాంగ్రెస్లో చేరారు. ఇప్పుడు తిరిగి పాత పార్టీలోకి అడుగుపెట్టారు. తాజాగా ప్రభుత్వ ఉద్యోగం నుంచి స్వచ్ఛంద పదవీ విరమణ చేసిన TNGO అధ్యక్షుడు మామిళ్ల రాజేందర్ కూడా BRSలో చేరారు. అటు BRSకు రాజీనామా చేసిన ఖానాపూర్ సిట్టింగ్ ఎమ్మెల్యే రేఖా నాయక్ కాంగ్రెస్ పార్టీలో చేరారు. ఆర్మూర్లో ఆమె రాహుల్ గాంధీ సమక్షంలో హస్తం కండువా కప్పుకున్నారు. మొత్తానికి ఎన్నికల నోటిఫికేషన్ వచ్చేలోపు తెలంగాణలో వలసలు, చేరికల జోరు మరింత పెరగడం ఖాయంగా కనిపిస్తోంది.
Admin